Вторник, 5 ноября 2024

Қарағанды академиясында «Алаш мұрасы: құқық жолындағы ізашарлар» тақырыбындағы жоғары оқу орындарының курсанттары мен студенттері арасында аймақтық пәндік викторина өтті. Бұл викторина қазақтың Алаш қозғалысының құқықтық мұрасын дәріптеу, жастар арасында құқықтық білімді насихаттау және ел тарихына деген қызығушылықты арттыру мақсатында ұйымдастырылды.

Конкурсқа қатысуға Қарағанды қаласының заң мамандықтарының студенттері шақыртылды. Пәндік викторинаға академик Е.А. Бөкетов атындағы Қарағанды университетінің «Алаш рухы», Қазтұтынуодағы Қарағанды университетінің «Азат», «Bolashaq» Академиясының «Тураби» және Қазақстан Республикасы ІІМ Б.Бейсенов атындағы Қарағанды академиясының «Алаш полициясы» командалары сайысқа түсті. Академия бастығы, полиция генерал-майоры Адилов Санжар Аскенұлы викторинаның салтанатты ашылу рәсімінде барлық қатысушыларға сәттілік тілеп, білім мен шығармашылықты дамытуға зор мүмкіндік беретін мұндай шаралардың маңыздылығын атап өтті. Командалар жеңіске деген құштарлығын көрсетіп, біліммен күш сынасып викторинаға белсенді қатысты. Викторинаның 4 кезеңінің нәтижесі бойынша КДФ 2-курс курсанттарының «Алаш полициясы» командасы бас жүлде алды.

1-орынға «Алаш рухы» командасы;
2-орын «Тураби» командасы;
3-орын «Азат» командасы ие болды.

Викторина қорытындысы бойынша жеңімпаздар дипломдармен марапатталады. Қатысушыларға номинациялар бойынша грамоталар берілді.