Суббота, 11 ноября 2023

ІІМ Қарағанды академиясында «ЖІГІТ СҰЛТАНЫ — 2023» ауқымды байқауы өтті.

Әділ қазылар алқасында ІІМ Кадр саясаты департаментінің бастығы Ораз Жолдасов, Академия бастығы Ақынқали Дәрменов, Қазақстандық әйгілі журналист, тележүргізуші, профюсер Майя Бекбаева, Қарағанды облысы бойынша Іскер әйелдер қауымдастығының төрағасы Индира Джабаева, Ардагерлер кеңесінің төрағасы Мағауйя Орманов, сондай-ақ,
Қарағанды облысы бойынша Сыбайлас жемқорлыққа қарсы іс-қимыл агенттігінің ардагерлер кеңесінің төрағасы Қуандық Қазанғапов болды.

Серілер сынына білекті де жүректі 10 курсант қатысып, мықтылықтарын танытты.

Таныстыру кезеңінде жігіттердің білімі, біліктілігі, сөз саптау, сөйлеу мәнері сыналды. Қатысушылар өзін, ата-тегін, өскен жерін дүйім жұртқа таныстырды.

Байқаудың екінші кезеңінде жігіттер өз өнерлерін паш етті. Бірі мәнерлеп оқыса, бірі аспаптың құлағында ойнады, ал бірі жауынгерлік күрес техникаларын көрсетті.

Сайдың тасындай сап түзеген сайыпқырандар сайыстың үшінші кезеңінде садақ атып, кір көтеріп күш сынасты. Үміткерлердің бұл сынағы да тартысты болды.

Барлық қатысушылар бір-бірінен қалыспай, керемет өнер көрсетті, алайда, жеңімпаз орны біреу ғана. Бұл жарыста үшінші курс курсанттарының намысын қорғап келген Алинұр Өтенов жеңіп шығып, «Жігіт сұлтаны — 2023» атанды.

Әр қатысушыға демеушілеріміздің сыйлық сертификаттары, ал Жігіт сұлтанына қазақ батырлары асынған бес қарудың бірі қылыш сыйға тартылды.

Тәуелсіз елдің ұландары осылайша мықтылықтарын танытып, «Жігіт сұлтаны» деген атқа лайық екендіктерін дәлелдеді!