Жұма, 29 Қараша 2024

Кеше біздің академияда қуаныш пен мақтанышқа толы ерекше күн болды. Академиямыздың курсанттары Каликанов Нұрасыл мен Закарин Нұрбек Өзбекстанда жекпе-жек бойынша өткен Әлем чемпионатында жеңіске жетіп, еліміздің абыройын асқақтатты. Олар спорттық шеберлік пен күш-жігердің үздік үлгісін көрсетіп, халықаралық аренада Қазақстанның намысын лайықты түрде қорғады.

Сондай-ақ, академия курсанттарынан құралған «КВШ» құрама командасы Қарағанды облысы бойынша өткен «Жайдарман» ойындарының чемпионы атанды. Бұл жастардың шығармашылық қабілеті мен тапқырлығын, сондай-ақ бір команда болып жұмыс істеу шеберлігін дәлелдейтін тамаша жетістік.

Осы жетістіктер академияның білікті қызметкерлері мен курсанттарының бірлескен еңбегі мен талпынысының жемісі болып табылады. Жеңімпаздарды академия ұжымы мен курсанттар салтанатты түрде күтіп алды. Олар курсанттардың жеңісіне қуанып, үлкен қошемет көрсетті.

Бұл жеңістер тек академиямыздың ғана емес, жалпы еліміздің жастарының талантын, әлеуетін және табандылығын айқындай түседі. Жеңімпаздарды шын жүректен құттықтап, оларға алдағы уақытта жаңа биіктер мен жеңістер тілейміз!