Бейсенбі, 31 Тамыз 2023

ІІМ Қарағанды академиясының бірінші курс курсанттары өткен жас жауынгерлер курсы аяқталды.

Дәстүр бойынша, Конституция күніне орай курсанттар оқу-далалық лагерінен Академияға дейінгі 40 км жолды жүгіріп өтті.

30 күндік дайындық бекер болған жоқ, себебі, ұлдар да, қыздар да уақытында, шыдамдылық пен төзімділік танытып, жақсы жүгіріп келді.

Қазір балалар казармаға орналасып, алғашқы оқу жылына кірісу үшін күш жинауда.

Академияда бірінші курс курсанттарын жоғары курс курсанттары, офицерлер құрамы және Академия бастығы, полиция генерал-майоры Ақынқали Дәрменов қарсы алды.

Ол ұлдар мен қыздарды жас жауынгер курсының аяқталуымен құттықтап, оқуда табыс тілеп, рухы мықты балаларды тәрбиелегені үшін ата-аналарына алғысын білдірді.