Пятница, 26 декабря 2025

Қазақстанның еңбек сіңірген спорт шебері, Құрмет орденінің иегері, екі дүркін Олимпиада ойындарының күміс жүлдегері Әділбек Ниязымбетов және Қазақстан Республикасына еңбек сіңірген спорт шебері, әлем және Азия чемпионы Мерей Ақшалов Қарағанды қаласына арнайы келіп, Қазақстан Республикасы ІІМ Бәрімбек Бейсенов атындағы Қарағанды академиясы курсанттарымен және ұжымымен кездесті.

Кездесу барысында Қазақстан бокс федерациясы мен Қазақстан Республикасы ІІМ Бәрімбек Бейсенов атындағы Қарағанды академиясы арасында өзара ынтымақтастық туралы меморандумға қол қойылды.

Бұл құжат ұзақ мерзімді серіктестікті бекітеді және келесі бағыттарды қамтиды:

• бірлескен білім беру және спорттық жобаларды іске асыру;
• боксты дамыту инфрақұрылымын жетілдіру;
• турнирлер, семинарлар мен конференциялар өткізу;
• тәжірибе алмасу және салауатты ұлтты қалыптастыруға бағытталған бағдарламаларды әзірлеу.

Бұл әріптестік спорт пен мемлекеттік кадр даярлау жүйесінің тоғысқан тұсы болып табылады. Кәсіби бокс тәртіп, көшбасшылық, отансүйгіштік пен жеке төзімділікті қалыптастыратын пәрменді құрал ретінде қарастырылады.

Федерация үшін бұл институционалдық дамуға жасалған маңызды қадам болса, академия үшін болашақ офицерлердің физикалық және моральдық беріктігін арттыратын заманауи мүмкіндік болып табылады.

Осындай серіктестіктерге салынған инвестиция елдің адам капиталына салынған инвестиция болып табылады. Ал адам капиталы мемлекеттің бәсекеге қабілеттілігінің негізгі тірегі болып саналады.

Обновлено: 26.12.2025 22:40