Суббота, 20 сентября 2025

Академиялық ұтқырлық бағдарламасы аясында Қазақстанға келген Өзбекстан мен Қырғызстан ведомстволық оқу орындарының курсанттары Қазақстан Республикасы ІІМ Бәрімбек Бейсенов атындағы Қарағанды академиясының ұйымдастыруымен Қарағанды облысындағы тарихи орын – КарЛаг музейіне барды.

КарЛаг – ХХ ғасырдың ең ірі еңбекпен түзеу лагерьлерінің бірі болып табылады. Мұнда мыңдаған жазықсыз адамдар қамауға алынып, ауыр еңбекке жегілді. Курсанттар музей экспозицияларымен танысып, саяси қуғын-сүргін құрбандарының тағдырынан сыр шертетін құжаттар мен жәдігерлерді көрді. Тергеу бөлмелері мен тұтқын камераларының атмосферасын сезіну жастарға өткеннің ауыр сабақтарын терең ұғынуға мүмкіндік берді.

Бұл сапар курсанттардың тарихи санасын қалыптастыруға және өткеннің қателіктерін қайталамауға деген ұмтылысын арттыруға бағытталған маңызды шара болды. Қазақстан Республикасы ІІМ Бәрімбек Бейсенов атындағы Қарағанды академиясы осындай іс-шаралар арқылы курсанттардың білімін кеңейтіп, олардың азаматтық жауапкершілігін арттыруға ықпал етеді.